13 ਮਹੀਨਿਆਂ ਬਾਅਦ ਖੁੱਲ੍ਹਿਆ ਸ਼ੰਭੂ ਬਾਰਡਰ

ਪਿਛਲੇ 13 ਮਹੀਨਿਆਂ ਤੋਂ ਬੰਦ ਸ਼ੰਭੂ ਬਾਰਡਰ ਅੱਜ ਆਖਿਰਕਾਰ ਖੁੱਲ੍ਹ ਗਿਆ ਹੈ। ਇੱਕ ਤਰਫਾ ਸਰਹੱਦੀ ਰਸਤਾ ਖੁੱਲ੍ਹਣ ਕਾਰਨ ਆਮ ਲੋਕਾਂ ਵਿੱਚ ਖੁਸ਼ੀ ਦਾ ਮਾਹੌਲ ਹੈ। ਬਾਰਡਰ ਬੰਦ ਹੋਣ ਕਾਰਨ ਪਿਛਲੇ 13 ਮਹੀਨਿਆਂ ਤੋਂ ਆਮ ਲੋਕਾਂ ਨੂੰ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ। ਅੱਜ ਸਰਹੱਦ ਖੁੱਲ੍ਹਣ ਨਾਲ ਲੋਕਾਂ ਨੇ ਸੁੱਖ ਦਾ ਸਾਹ ਲਿਆ ਹੈ।

ਲੋਕ ਹੋ ਰਹੇ ਸਨ ਪਰੇਸ਼ਾਨ:—-ਸ਼ੰਭੂ ਸਰਹੱਦ ਬੰਦ ਹੋਣ ਕਾਰਨ ਹਰਿਆਣਾ ਤੇ ਪੰਜਾਬ ਦਾ ਵਪਾਰੀ ਵਰਗ ਕਾਫੀ ਪੇਰਸ਼ਾਨ ਸਨ। ਅੰਬਾਲਾ ਤੋਂ ਪੰਜਾਬ ਅਤੇ ਚੰਡੀਗੜ੍ਹ ਜਾਣ ਵਾਲੇ ਲੋਕਾਂ ਨੂੰ ਵੀ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ ਪਰ ਬੀਤੇ ਦਿਨੀਂ ਪੰਜਾਬ ਪੁਲਿਸ ਦੀ ਕਾਰਵਾਈ ਤੋਂ ਬਾਅਦ ਬਾਰਡਰ ਖੋਲ੍ਹਣ ਦੀ ਖ਼ਬਰ ਨੇ ਸਾਰਿਆਂ ਦੇ ਚਿਹਰੇ ‘ਤੇ ਮੁਸਕਰਾਹਟ ਲਿਆ ਦਿੱਤੀ ਹੈ। ਇੱਕ ਪਾਸੇ ਕੱਪੜਾ ਵਪਾਰੀਆਂ ਅਤੇ ਟਰਾਂਸਪੋਰਟਰਾਂ ਵਿੱਚ ਖੁਸ਼ੀ ਦਾ ਮਾਹੌਲ ਹੈ। ਪੰਜਾਬ ਤੋਂ ਅੰਬਾਲਾ ਜਾਣ ਵਾਲੀਆਂ ਔਰਤਾਂ ਨੇ ਵੀ ਸਰਹੱਦ ਖੁੱਲ੍ਹਣ ‘ਤੇ ਖੁਸ਼ੀ ਦਾ ਇਜ਼ਹਾਰ ਕੀਤਾ ਹੈ।

ਜਾਣੋ ਕੀ ਕਹਿਣਾ ਹੈ ਅੰਬਾਲਾ ਨਿਵਾਸੀਆਂ ਦਾ :—-ਬਾਰਡਰ ਖੁੱਲ੍ਹਣ ‘ਤੇ ਦੁਕਾਨਦਾਰ ਰਜਿੰਦਰ ਨੇ ਕਿਹਾ, “ਬਾਰਡਰ ਖੁੱਲ੍ਹਣ ਨਾਲ ਸਾਨੂੰ ਕਾਫੀ ਰਾਹਤ ਮਿਲੀ ਹੈ। ਬਾਰਡਰ ਬੰਦ ਹੋਣ ਕਾਰਨ ਅਸੀਂ ਜੋ ਕੰਮ ਕੁਝ ਘੰਟਿਆਂ ‘ਚ ਕਰਦੇ ਸੀ, ਉਹ ਲੇਟ ਹੋ ਰਿਹਾ ਸੀ। ਪੰਜਾਬ ਤੋਂ ਹਰਿਆਣਾ ਮਾਲ ਲਿਆਉਣ ‘ਚ ਦਿੱਕਤ ਆ ਰਹੀ ਸੀ।”

ਇਸ ਦੇ ਨਾਲ ਹੀ ਟੈਕਸਟਾਈਲ ਕਾਰੋਬਾਰੀ ਮਨੋਜ ਜੋਸ਼ੀ ਨੇ ਸਰਹੱਦ ਖੁੱਲ੍ਹਣ ‘ਤੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ ਹੈ। ਉਨ੍ਹਾਂ ਕਿਹਾ, “ਸਾਡਾ ਮਾਲ ਲੁਧਿਆਣਾ ਤੋਂ ਆਉਂਦਾ ਹੈ ਅਤੇ ਗਾਹਕ ਵੀ ਪੰਜਾਬ ਤੋਂ ਆਉਂਦੇ ਹਨ, ਜੋ ਸ਼ੰਭੂ ਬਾਰਡਰ ‘ਤੇ ਨਾਕਾਬੰਦੀ ਕਾਰਨ ਨਹੀਂ ਆ ਰਹੇ ਸਨ। ਪੰਜਾਬ ਜਾਣ ਲਈ ਚੰਡੀਗੜ੍ਹ ਦੇ ਰਸਤੇ ਜਾਣਾ ਪੈਂਦਾ ਸੀ, ਜਿਸ ਨਾਲ ਸਮੇਂ ਦੇ ਨਾਲ ਮਾਲੀ ਨੁਕਸਾਨ ਵੀ ਹੁੰਦਾ ਸੀ।”ਹਰਿਆਣਾ ਦੀ ਘਰੇਲੂ ਔਰਤ ਅਨੀਤਾ ਸ਼ਰਮਾ ਨੇ ਵੀ ਸਰਹੱਦ ਖੁੱਲ੍ਹਣ ‘ਤੇ ਖੁਸ਼ੀ ਜ਼ਾਹਰ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ‘ਘੰਟਿਆਂਬੱਧੀ ਆਵਾਜਾਈ ਕਾਰਨ ਅਸੀਂ ਸਮੇਂ ਸਿਰ ਨਹੀਂ ਪਹੁੰਚ ਸਕੇ। ਹੁਣ ਲੋਕਾਂ ਲਈ ਪੰਜਾਬ, ਚੰਡੀਗੜ੍ਹ ਅਤੇ ਹਰਿਆਣਾ ਦਾ ਸਫਰ ਕਰਨਾ ਆਸਾਨ ਹੋ ਜਾਵੇਗਾ।’

ਪੰਜਾਬ ਪੁਲਿਸ ਨੇ ਲਿਆ ਐਕਸ਼ਨ—–ਸ਼ੰਭੂ ਅਤੇ ਖਨੌਰੀ ਬਾਰਡਰ ‘ਤੇ ਕਰੀਬ 13 ਮਹੀਨਿਆਂ ਤੋਂ ਧਰਨੇ ‘ਤੇ ਬੈਠੇ ਅੰਦੋਲਨਕਾਰੀ ਕਿਸਾਨਾਂ ਖਿਲਾਫ ਪੰਜਾਬ ਪੁਲਿਸ ਨੇ ਵੱਡੀ ਕਾਰਵਾਈ ਕਰਦੇ ਹੋਏ ਕਿਸਾਨਾਂ ਨੂੰ ਦੋਹਾਂ ਸਰਹੱਦਾਂ ਤੋਂ ਹਟਾ ਦਿੱਤਾ ਹੈ। ਪੰਜਾਬ ਪੁਲਿਸ ਨੇ ਯੋਜਨਾਬੱਧ ਤਰੀਕੇ ਨਾਲ ਸ਼ੰਭੂ ਅਤੇ ਖਨੌਰੀ ਸਰਹੱਦਾਂ ‘ਤੇ ਪ੍ਰਦਰਸ਼ਨ ਵਾਲੀਆਂ ਥਾਵਾਂ ਨੂੰ ਖਾਲੀ ਕਰਵਾਇਆ। ਪੁਲਿਸ ਨੇ ਬੈਰੀਕੇਡਾਂ, ਵਾਹਨਾਂ ਅਤੇ ਅਸਥਾਈ ਢਾਂਚੇ ਨੂੰ ਹਟਾ ਦਿੱਤਾ ਹੈ। ਕਿਸਾਨਾਂ ਦੇ ਟੈਂਟ ਬੁਲਡੋਜ਼ਰਾਂ ਨਾਲ ਉਖਾੜ ਦਿੱਤੇ ਗਏ। ਕਰੀਬ 800 ਕਿਸਾਨਾਂ ਨੂੰ ਹਿਰਾਸਤ ਵਿੱਚ ਲਿਆ ਗਿਆ। ਇਨ੍ਹਾਂ ਵਿੱਚ ਕਿਸਾਨ ਆਗੂ ਜਗਜੀਤ ਸਿੰਘ ਡੱਲੇਵਾਲ ਅਤੇ ਸਰਵਣ ਸਿੰਘ ਪੰਧੇਰ ਸ਼ਾਮਿਲ ਹਨ।