ਬੱਦਲ ਫਟਣ ਨਾਲ ਵਿਗੜ ਸਕਦੇ ਨੇ ਹਾਲਾਤ

ਹਿਮਾਚਲ ਪ੍ਰਦੇਸ਼ ਵਿਚ ਬੱਦਲ ਫਟਣ ਦੀਆਂ ਘਟਨਾਵਾਂ ਰੁਕਣ ਦਾ ਨਾਮ ਨਹੀਂ ਲੈ ਰਹੀਆਂ ਹਨ। ਇਸ ਕਾਰਨ ਲੋਕਾਂ ਦੀ ਚਿੰਤਾ ਵਧ ਗਈ ਹੈ। ਮੰਡੀ ਅਤੇ ਚੰਬਾ ਜ਼ਿਲ੍ਹਿਆਂ ਤੋਂ ਭਾਰੀ ਤਬਾਹੀ ਦੀਆਂ ਖ਼ਬਰਾਂ ਆਈਆਂ ਹਨ। ਜਿੱਥੇ ਮੰਡੀ ਜ਼ਿਲ੍ਹੇ ਦੇ ਪਧਰ ਸਬ-ਡਿਵੀਜ਼ਨ ਦੇ ਚੌਹਾਰਘਾਟੀ ਵਿੱਚ ਬੱਦਲ ਫਟਣ ਨਾਲ ਤਬਾਹੀ ਹੋਈ ਹੈ, ਉੱਥੇ ਹੀ ਚੰਬਾ ਜ਼ਿਲ੍ਹੇ ਦੇ ਚੁਰਾਹ ਵਿਧਾਨ ਸਭਾ ਹਲਕੇ ਵਿੱਚ ਵੀ ਬੱਦਲ ਫਟਣ ਨਾਲ ਵੱਡਾ ਨੁਕਸਾਨ ਹੋਇਆ ਹੈ।

ਬੀਤੀ ਰਾਤ ਲਗਭਗ 12 ਵਜੇ ਪਧਰ ਸਬ-ਡਿਵੀਜ਼ਨ ਦੇ ਚੌਹਰਘਾਟੀ ਦੇ ਕੋਰਤਾਂਗ ਪਿੰਡ ਵਿੱਚ ਨਾਲੇ ਵਿੱਚ ਤੇਜ਼ ਹੜ੍ਹ ਆਇਆ। ਹੜ੍ਹ ਕਾਰਨ ਪਿੰਡ ਦੇ ਨੇੜੇ ਬਣਿਆ ਇੱਕ ਪੁਲ ਅਤੇ ਤਿੰਨ ਫੁੱਟ ਬ੍ਰਿਜ ਪਾਣੀ ਵਿੱਚ ਵਹਿ ਗਏ। ਸਥਾਨਕ ਲੋਕਾਂ ਅਨੁਸਾਰ ਨਾਲੇ ਦੇ ਕੰਢੇ ਰਹਿਣ ਵਾਲੇ ਪਿੰਡ ਵਾਸੀਆਂ ਦੀ ਉਪਜਾਊ ਜ਼ਮੀਨ, ਖੜ੍ਹੀਆਂ ਫਸਲਾਂ ਅਤੇ ਬਾਗ ਵੀ ਪਾਣੀ ਅਤੇ ਮਲਬੇ ਵਿੱਚ ਡੁੱਬ ਗਏ ਹਨ।

ਪਿੰਡ ਵਾਸੀਆਂ ਵਿੱਚ ਡਰ ਦਾ ਮਾਹੌਲ—–ਖੁਸ਼ਕਿਸਮਤੀ ਦੀ ਗੱਲ ਹੈ ਕਿ ਇਸ ਹਾਦਸੇ ਵਿਚ ਕੋਈ ਜਾਨੀ ਜਾਂ ਮਾਲੀ ਨੁਕਸਾਨ ਨਹੀਂ ਹੋਇਆ, ਪਰ ਪਿੰਡ ਲਈ ਗੰਭੀਰ ਖ਼ਤਰਾ ਹੈ। ਪੰਚਾਇਤ ਪ੍ਰਧਾਨ ਪ੍ਰੇਮ ਸਿੰਘ ਠਾਕੁਰ ਅਤੇ ਬੀਡੀਸੀ ਮੈਂਬਰ ਕਮਲਾ ਠਾਕੁਰ ਨੇ ਕਿਹਾ ਕਿ ਨਾਲੇ ਦਾ ਤੇਜ਼ ਵਹਾਅ ਅਤੇ ਕਟੌਤੀ ਪਿੰਡ ਦੀ ਜ਼ਮੀਨ ਅਤੇ ਘਰਾਂ ਨੂੰ ਲਗਾਤਾਰ ਨੁਕਸਾਨ ਪਹੁੰਚਾ ਰਹੀ ਹੈ।ਸਥਿਤੀ ਦੀ ਗੰਭੀਰਤਾ ਨੂੰ ਵੇਖਦੇ ਹੋਏ ਪੰਚਾਇਤ ਪ੍ਰਧਾਨ ਨੇ ਐਸਡੀਐਮ ਪਧਰ ਨੂੰ ਪੂਰੀ ਘਟਨਾ ਬਾਰੇ ਸੂਚਿਤ ਕੀਤਾ ਹੈ। ਐਸਡੀਐਮ ਪਧਰ ਸੁਰਜੀਤ ਸਿੰਘ ਠਾਕੁਰ ਨੇ ਕਿਹਾ ਕਿ ਪ੍ਰਸ਼ਾਸਨਿਕ ਟੀਮ ਨੂੰ ਮੌਕੇ ‘ਤੇ ਭੇਜਿਆ ਗਿਆ ਹੈ, ਜੋ ਨੁਕਸਾਨ ਦਾ ਮੁਲਾਂਕਣ ਕਰਨ ਤੋਂ ਬਾਅਦ ਲੋੜੀਂਦੀ ਕਾਰਵਾਈ ਕਰੇਗੀ।

ਇਸ ਦੌਰਾਨ ਚੰਬਾ ਜ਼ਿਲ੍ਹੇ ਦੇ ਚੁਰਾਹ ਵਿਧਾਨ ਸਭਾ ਹਲਕੇ ਦੇ ਚੰਜੂ ਵਿੱਚ ਵੀ ਬੱਦਲ ਫਟਣ ਦੀ ਘਟਨਾ ਵਾਪਰੀ ਹੈ। ਭਾਗੀਗੜ੍ਹ ਨੇੜੇ ਚੰਜੂ ਵਿੱਚ ਭਾਰੀ ਹੜ੍ਹ ਕਾਰਨ ਲੋਹੇ ਦਾ ਪੁਲ ਨੁਕਸਾਨਿਆ ਗਿਆ ਹੈ। ਇਹ ਰਾਹਤ ਦੀ ਗੱਲ ਹੈ ਕਿ ਇੱਥੇ ਵੀ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ ਹੈ।ਵਿਭਾਗੀ ਟੀਮ ਮੌਕੇ ‘ਤੇ ਪਹੁੰਚ ਗਈ ਹੈ ਅਤੇ ਸੜਕ ਨੂੰ ਬਹਾਲ ਕਰਨ ਦਾ ਕੰਮ ਜਾਰੀ ਹੈ। ਪ੍ਰਸ਼ਾਸਨ ਨੇ ਸਥਾਨਕ ਲੋਕਾਂ ਨੂੰ ਸਾਵਧਾਨ ਰਹਿਣ ਅਤੇ ਨਾਲੇ ਦੇ ਕਿਨਾਰਿਆਂ ਦੇ ਨੇੜੇ ਨਾ ਜਾਣ ਦੀ ਅਪੀਲ ਕੀਤੀ ਹੈ।